麥玲玲：
１：「金融、銀行等要小心，股票屬金，火旺年股民要較克制」
結果：今年證券、銀行、內險、以至係大市，都係升的！不過，嚴格來講，佢係冇錯。做人做事，升市跌市，人生一年365日，要小心、克制是always right！中！
２：「正月（2月4日至3月5日）外圍局勢不穩，交投淡靜，市場有回吐壓力」
結果：大市於低位徘徊。中！
３：「3月及4月（4月5日至6月5日）略有炒賣氣氛，眼明手快者可望有進賬」
結果：大市個浪向上移，都算有氣氛嘅，至於後面嗰句，同我講靚嘅人多人追有咩分別？
４：「5月（6月6日至7月6日）雖有財星透出，但同時危機四伏」
結果：射十二碼，一係入，一係唔入。中！
５：「6月（7月7日至8月6日）天合地合之月，上落更大，慎防市況隨時逆轉」
結果：大市衝高，的確上得好快，後面嗰句，相信係一個頭盔，中！
６：「下半年不是看得太淡，農曆7月（8月7日至9月7日）會有好現象」
結果：大市見全年高位，中！
７：「10月（11月7日至12月6日）整體特別理想，投資者回復信心，氣氛不俗」
結果：成交係多嘅，中！
８：「國與國關係緊張，四六入中宮，報紙、傳媒控制性強，有點像以前的文字獄，會是全球性。」
結果：好中！
蘇民峰：宜短炒勿長揸
【預測】
二○一五年是單數年，一般股市都是先升後跌才對，入市買貨可於農曆新年前後進行，不過有兩個關鍵日子需要沽貨，西曆的五月六日和八月八日，以上日子往後形勢可能出現逆轉，整體到二○一七年，股市都是以上落格局，以炒波幅為主。
五行方面的走勢趨向平均，沒有過去兩年的極端情況，表現最佳仍是以火行先，其中包括電腦科技、電力能源、電話、燃煤及石油等，由於火去年已經領先，故屬水的航運、零售及賭業的反彈力度會是最強。
由於羊年為水火互換年，要到二○一六至二○二一年為金水年，經濟才會慢慢回復活躍，尤其是二○一九至二○二一年這數年會加速發展，故今年買賣股票要步步為營，短期獲利也要收割為先，宜看短不看長。市況恐較為波動，短線已經獲利，皆以套現為先。
【回顧】
二○一四年大市呈「先跌後升」格局，策略是新曆一月先入一批貨（股票），五至六月立夏之際再入一批，儲到秋冬就是收成之時。另外，二○一○至二○一五年這段時間大市其實是難玩的，大致上「冇得玩長線」，宜買一些防守性強的股票。
【結果】
港股二○一四年最終出現中段爆升的格局，新曆九月指數曾衝至25000樓上，若按蘇民峰策略待年尾收成時，一月買的股票應有斬獲，至於五六月掃的貨應有微利，但死坐不是辦法，因資金乾坤大挪移，由科網股轉炒中資、券商股，學師傅話齋玩長線只有輸錢的份兒。
準繩度︰60%
１：「大市應該呈『先跌後升』格局，但要留意因經濟進一步踏入穩固期，故不宜過份進取」
結果：先跌後升係岩。投資價格可升可跌，大家不宜過份進取，果然係真理。中！
２：「上半年即使上升也宜先行套現，切勿過份樂觀，得些好意須回手」
結果：呢一句套入春夏秋冬都得！阿媽教落，任何事都唔好去到盡，得些好意須回手。中！
３：「1月先入一批貨（股票），5至6月立夏之際再入一批，儲到秋冬就是收成之時」
結果：的確下半年市好啲，中！
６：「大致上是『冇得玩長線』，宜買一些防守性強的股票」
結果：你唔好走去諗公用股、收租股股價點，因為買呢類股票，又係永遠是對的，中！
７：「投機炒賣可免則免，切勿輕舉妄動」
結果：蘇師傅做咗投資推廣署代言人？不過都係岩！中！題外話，殼股今年炒得好勁
沈振盈：六月出現高位
【預測】
今年流年「木」重，命主「財多身子弱」格局，意味經濟底子差但資金足，沒有能力承受大財，賺回的錢不能保管，「搵幾多嘔幾多」。
套用在目前環球市況，則歐日放水及多國減息下，或引發環球貨幣戰爭，市場並非將金錢放入商業社會投資，而是用於投機，經濟有轉機之虞；從股市角度看，則是股市會因資金推動上升，但盈利卻跟不上，形成最終大市或倒跌收場，羊年股市將波動偏淡。
羊年恒指高位或在二萬六至二萬七關，低位則料在萬九至二萬關口，意味高低波幅料達八千點。整體趨勢看，新曆二月起步後大市即偏淡，首個浪要屆四月出現，直至六月造頂，其後七至八月回調，直至九至十月再衝高，但未必可高於六月水平，其後即再有下行壓力。
【回顧】
馬年估大市資金不足而「群劫爭財」，資金匱乏局面會僅次於金融海嘯年，雖然利淡但未必會有大股災，走勢上料新曆二月會走弱，直至四月造底，六月反彈，因此最好買貨時機在夏天至秋天，九月後再走弱，直至十一月後才回升。
【結果】
美股去年不急加息，兼遇上歐洲日本均持續放水，環球市場資金仍然氾濫，未如預測般出現資金匱乏局面。不過，其大市趨勢預測卻準繩，恒指馬年全年低位在新曆三月底，六月至八月底大反彈後走弱，十二月開始才回升。
準繩度︰70%
１：「『群劫爭財』四字歸納，即『唔夠錢』，市場會出現因財而起的爭執及官非」
結果：在下有個日文名，叫「長期糧尾」，中！
２：「樓市及經濟增長均會放緩，『好多嘢會由好變差』」
結果：中一半啦！樓市2014年又創新高。
３：「應用於股市，成交及炒風同樣不會熱烈，全球市場情況亦然，是值得提防的一年，『小心為上，持盈保泰』」
結果：中！不過美股、日股今年好勁囉
４：「指數在新曆2月起即走弱」
結果：中！
５：「直至4月造底」
結果：全年低位喺3月，4月整固，都算做中！
６：「持續低位徘徊至6月才反彈，故今年夏至秋天是最佳投資時刻」
結果：中！
７：「惟9月後大市又再走弱」
結果：中！
８：「直至11月後又才會掉頭走上」
結果：中！
李丞責：下半年有股災
【預測】
羊並非有物慾的動物，有理想及遠景，但卻欠行動力，亦為人口不安之年。年內將會有三次日食，上半年兩次，下半年一次，其中於新曆三月二十日將會有一次日環食，相信這次日食將會與健康有關，有關日食的效力將會在一百日內呈現。
至於下半年，有一次日全食於新曆九月二十八日出現，這次日食的效力較大，有效期於六十日內，相信於這段期間，會發生一次股災，恒指將會於21000水平徘徊。
預測年內將會有疾病流行，從經濟角度而言，將不會有一個行業特別強勢，但卻可預期各國積極救經濟，因而會令旅遊或基建業會相對較好，總括而言，羊年會是先破後成，做事有包容能力能趨吉避凶。
雖然整體經濟及股市表現會較波動，不過，本港目前正處於八運中，主張平穩，所以大家亦不需要有過份恐慌的情緒。
【回顧】
預料馬年股市首季較佳，第二三季問題浮現，至第四季平復，料恒指以23000點為中線，上下為21000點及24400點，流年農曆四月至七月最有機會下調，大多數股災在四至十一月間。
【結果】
馬年股市先低後高。踏入馬年之後，港股年初時一直於21000點水平徘徊，及至新曆三月份跌至全年低位21182點後，穩步攀升至25000點水平，九月份更造出全年高位25317點，其後於24000點以上水平反覆。
準繩度︰40%
１：「有人事政治事件，投資應持保守態度，首季宜獲利」
結果：前面一句中！後一句，跟佢炒就慘了，錯！
２：「第二三季問題浮現」
結果：中！
３：「第四季平復」
結果：中！
４：「料恒指23000點為中線，上下為24400至21000點」
結果：中！大市大部份時間，的確係呢個位徘徊
５：「流月農曆四月至七月最有機會下調」
結果：呢段時間，大市炒高。錯！
６：「大多數股災在新曆4及11月之間，都是小提防的月份」
結果：4及11月，你講晒啦！中！
７：「馬羊宜持保守態度」
結果：又講真理，中！
結論：
麥玲玲、蘇民峰預測大致準確，但講嘢非常圓滑，點睇都會係中。沈大師講嘢話一就一，唔會點戴頭盔，講走勢方面，又真係中晒！至於李丞責呢……你有眼睇。有個共通點係，個個都叫你保守、小心，如果做散戶，吓吓都咁保守、咁小心，唔好炒股去做定存算啦。
所以話，玄學嘅嘢，聽完咪算。你覺得「風水佬呃你十年八年」，但信嘅大有人在。不過在反智的年代，比起講得出「走私奶粉案升代表執法得嚴」、「廉潔程度變差因廉署破大案」呢類指黑為白說話嘅人，我寧願相信風水佬嘅流年預測。
by千頌C@堆填區
http://fb.com/winbigwok
沒有留言:
張貼留言