年尾兩件大事對環球資產都有相當影響，其一為10月或12月美國是否加息，其二為11月IMF是否俾人民幣加入SDR。美國喺加息問題上煩過唐三藏，市場對FED委員講話嘅反應越來越冷淡，顯示出口術或前瞻引導效力漸降。但零零舍舍有個國家反應越來越大，嗰個就係中國。過去中國嘅態度都係定啲嚟、冇事嘅，日前財政部長樓繼偉則話美國要承擔更多責任，唔具備加息條件。
有一個基本原理，由於中國係行結匯制，外資進入中國後要換成人民幣，外匯成為人民幣嘅發行基礎，M1條數同外匯佔款係差唔多，而M2條數則經貨幣乘數放大4至5倍。所以當外資離開中國多於入去時，中國嘅基礎貨幣會收縮，形成通縮，對下滑緊嘅經濟踩多腳；如果想靠谷大M2條數去頂貨幣流通量，代表人民幣含美金量下跌，人民幣匯率就有貶值壓力。
想匯率頂住，貨幣政策又自己揸晒fit，資本就冇辦法完全自由流動，三樣只可以揀兩樣。想乜都夾硬嚟自己話點就點，無論係Mundell-Fleming model定Paul Krugman講嘅eternal triangle都係搞唔掂，除非閂埋門鎖國學周伯通自己玩左右互搏。喺咁樣嘅情況下，可以見到美國加息同人民幣加入SDR係陰陽兩面，美國慢加息而人民幣入SDR，人民幣成為國際儲備貨幣通縮壓力驟減，大家happy；美國加息而人民幣冇得入SDR，人民幣就頭痕；美國唔加息，人民幣入SDR，中國着數晒；美國唔加息，人民幣唔入SDR，你眼望我眼繼續曖昧關係。
今年6月上證炒到5000點，諗住MSCI搞得掂搵外資接貨，結果衰咗，股市插四成，加上現時人民幣匯率97折，價位開始有吸引力。A股因為大量上市公司老細拎自己公司股票去抵押套現，唔可以再大跌，否則會出現大規模斬倉危機，所以中央有動機喺呢個水平死托。A股由停牌、禁沽空到拉人封艇，成交狂縮，個市已被造乾，咁樣要再大插唔易。因此11月若有風聲人民幣可以加入SDR，意味稍後MSCI好大機會有得傾，第二條喉深港通亦會開畀外資有得進出，A股則有運行，同時顯示中美兩國講掂數，美國開始慢加息。
沒有留言:
張貼留言