六件患有拇趾外翻人仕必須知道的事
1）「拇趾外翻一定係著高踭尖頭鞋引致？」大型研究指出，拇趾外翻最大因素係「遺傳」。遺傳嘅意思唔係一出世就有拇趾外翻，而係身體整體關節太過柔軟，俗稱「張力較低」所引致。張力較低嘅人，足弓問題會比較明顯，令拇趾功能都相應下降，久而久之出現拇趾外翻問題。反而一般認為最主要兇手嘅高踭鞋，統計學上反映出嚟嘅影響唔大，因為好多人無著高踭鞋嘅習慣，都一樣會出現拇趾外翻嘅情況。
2）「對鞋有咁闊得咁闊？」錯！當然窄嘅鞋會因夾腳而刺激到凸出嘅波子骨。不過太闊嘅鞋亦會出現問題。如果鞋帶綁緊，足部仍然有空間衝前，就會引起走位，輕則引起腳趾關節嘅皮膚磨擦，重則會令足底筋肉負荷過多引起足弓痛。其實試鞋只要腳趾唔覺得迫，而腳背有緊貼感覺就最適合。
3）拇趾外翻嘅痛楚有兩種，一種純粹因爲壓到凸出嘅波子骨而產生，痛楚感覺好表面。通常穿著返有鞋帶嘅鞋（例如波鞋）就立即無事。不過亦有唔少人嘅痛楚係關節裡面嘅冤痛，呢種痛即使著幾好嘅鞋亦有機會出現，因為同拇趾活動時嘅力學問題有關。去到呢個層面就必須尋求鞋墊治療。
4）如果拇趾外翻角度開始嚴重，會令拇趾功能下降。行路/跑步本來需要靠拇趾用力推進身體，當佢功能下降，第二第三趾會取代拇趾用力，奈何二三趾比拇趾幼，承受額外工作時會負荷過大，形成前掌中間位置痛及起繭。
5）如果有一邊腳拇趾外翻比較輕微，另一邊比較嚴重，唔好慶幸有一邊無事，反而更加需要擔心。因為拇趾外翻唔對稱，其實係代表雙腳受力並非50:50，好大機會同時有「長短腳」、「脊柱側彎」等問題。處理拇趾外翻時要同時處理以上問題先可以從根源治理。
6）「係咪要做手術？」拇趾外翻手術嘅功能係回復拇趾角度同埋清走凸出嘅波子骨，由於無處理到一開始引起拇趾外翻嘅力學問題，所以角度都有機會再次變差。通常手術後醫生都會建議病人穿著鞋墊，由力學根源去保護拇趾關節，避免復發。至於應唔應該做手術，就要衡量拇趾外翻有幾影響生活：有人因為外觀已經覺得需要做，有人直到波子骨大到買唔到鞋甚至一二趾重疊埋先做，人人不同。
拇趾外翻同足弓有幾大關係？鞋墊點解控制到拇趾外翻？可以到網頁版睇睇詳細講解：www.sportalignment.com/sym_hv.html
