蘇民峰:2019年初為入市好時機！
『蘇民峰』最新發佈 2019豬年12生肖運程精選版
蘇民峰︰兩國遲早攬炒
狗去豬來，新一年股民自然寄望豬年可扳回一城，由於過去一年環球市場受中美貿易戰等外圍因素影響，大市由高位下滑，恒指一度由狗年初30,873點（2018/2/20）下跌兩成至24,585點（2018/10/30），令不少股民都損手，幸好年尾大市回升，一度重上28,000點，氣氛才稍為回暖。
去年準確預測大市走勢為「先跌後升」的堪輿學家蘇民峰，豬年預測為「先升後跌」，而香港經濟會持續向上，旅遊業特別暢旺；至於中美貿易戰談判，他認為中國或者會短暫佔優，但兩國遲早一齊「攬炒」，「美國係馬上死，中國係慢慢死。」
蘇師傅就話，兩國衝突是否持續不得而知，但從玄學角度看兩國運勢，行運當中的中國，似乎較美國好一些，「美國經濟循環就12年一次，2006年佢係最高位，之後回落，2012年係最低位，六年之後2018年咪最高位囉！所以而家美國經濟喺個頂，到頂就冇得再頂啦；中國原來1984年行地運就行到2024年，有40年地運，2004年到2024年就旺西南水，西南有水嘅地方經濟都會上。所以，中國經濟會上到2024年，美國而家到頂，即係（貿易戰）影響美國會大過中國。」
從實際層面看，蘇師傅都認為合理，因為美國向中國徵稅，對自己的影響反而立竿見影，美國物價已因此上升，中國的影響則較遲才出現，生意會逐漸減少，「我識內地做設計、樓宇買賣、廠嘅人，全部唔郁，完全無生意，佢哋手頭唔係無錢，係睇定條路，真係唔掂先會搬去越南。」
蘇師傅認為中美貿易戰根本無贏家，大家最後會一齊攬炒，「中國暫時呢幾年好運過美國，但有個隱憂係2024年，美國到時行到最低點，而中國又行運到2024年，到時大家一齊行完運，先至驚呀！」
至於夾在中間的香港，蘇師傅則派定心丸，因為香港以金融業及旅遊業為主，並非製造業，中美貿易戰對香港影響不大，而且玄學上，香港經濟由2016年至2021年都向好，短期內都不用害怕，「2019、2020、2021三年都係大水年，都係旺旅遊，旅遊就最好啦，全世界都推廣旅遊，簡直係一盤唔使錢嘅生意。」
蘇民峰平時喜歡周遊列國，世界各地除了中國遊客，越來越多韓國人及東南亞人，尤其到日本滑雪就看到很多來自泰國、新加坡、馬來西亞遊客，「全世界興旅遊，泰國同韓國聚咗十幾廿年財富，啲人開始有錢就去旅行。」
豬年的投資策略，蘇師傅建議投資者有賺就要止賺，不要貪心持貨至年尾，否則隨時輸凸，「今年1月、2月係低位，但低極都可能係24,000至25,000點，而今年高位就未必穿29,000點，所以賺到5%、10%就已好好啦！」
記者：鍾耀恆
買股不靠運 最易賺錢掌相係呢種
豬年到！股民新一年最關心自己財運，但蘇民峰話原來投資股樓屬正財，投機才是偏財，而十二生肖的運程變化遠不及個人運氣及能力，「2017年升市，十個有九個半都賺錢，唔通個個都行運？2018年跌市，十個有九個半都蝕，無理由個個都唔行運嘛！」
蘇師傅講投資，最重要睇個人眼光和定力，就算捕捉到升市走勢，假如入貨猶豫不決，隨時賺少幾蚊，貪心的話又會錯過沽貨時機，由贏變蝕，「好多人成日問我投資有無橫財運，我話橫乜鬼財呀，中六合彩先係橫財，買樓買股票就講個人眼光同定力，同埋跟唔跟到大市走勢。」
一個人是否適合買股票，第一就看眼神，如果像蘇師傅般眼有神，決斷力會較好，「決斷力較快適合短炒，輸你夠膽斬，贏你夠膽一路揸落去，咁就容易贏面大啦；眼無神啲人拖泥帶水、優柔寡斷，如果短炒佢真係贏就贏粒糖，輸就輸間廠就死得啦！」
雖然如此，眼無神不等於不可投資，師傅話無決斷力，就可轉策略為長線投資，一於鬥長命長揸到底。
第二就看個鼻的氣勢，鼻要夠白，沒有暗瘡，假如鼻起紅氣就會諸事不利，鼻頭紅就破正財，兩邊紅就破橫財，總之師傅話鼻紅紅時就要收手，鼻氣色靚就可以落注。
至於鼻形，鼻孔外露則屬偏財鼻，鼻孔細就屬正財鼻，或叫孤寒鼻，「孤寒鼻有好處喎，最多輸少少錢，唔夠膽買得多，而偏財鼻就大上大落啦，所以你留意好多富豪都係偏財鼻。」古語有云「鼻孔露，財難聚」，但蘇師傅話是錯，因為古代人靠儲錢發達，而現代人靠投機才有發達，所以現今來說富豪大都偏財鼻。
面相反映個人能力，掌就反映運氣，蘇師傅話掌白叫「符碌得財」，特別容易有偏財，而無名指對落有個米字紋、星紋或直紋的成功線，都屬比較利財運，就算不懂股票，都有運容易賺錢，甚至有運中六合彩。掌紅叫「辛苦得財」，股民就需要勤力研究公司年報，熟讀專家分析等，才會賺到錢。
買股票最緊要數口精，頭腦線打橫的人就計數叻，有利投資，頭腦線深及清，思想夠集中，淺又模糊的話，思想比較飄忽，多雜紋就代表思考混亂，蘇師傅建議容易思考混亂的人，集中研究一兩隻股或板塊就好，不要學人手握十多隻股，否則令自己混亂。
而頭腦線跟生命線連着的長度，代表你考慮一件事的長度，愈長代表愈不善於作決定；至於手指公要夠長，到食指第三節一半的話代表有決斷力，跟眼有神一樣有利作投資決定。
記者：鍾耀恆
https://hk.finance.appledaily.com/finance/realtime/article/20190205/59222651?fbclid=IwAR1YNULv5je1kahCTawMZZ55AvYZrdnlib1qfOhLy1mHtAqIxNyHg5uMqIY
沒有留言:
張貼留言