殼股大莊家的清單

在股場打滾多年的炒友，對中南證券及其掌舵人莊友堅，應該不會陌生。Eugene莊馳騁股壇，手持多隻殼股，透過港交所中央結算系統持股紀錄查詢（CCASS），由中南證券「揸住」的股票，股權多於一成以上的，數目達到25隻。

坊間有個blogger，整了個華匯指數，主要將中南證券持有的一籃子股票指數化，某程度可反映細價股整體表現。今年細價股甚至殼股當炒，筆者未知指數實際表現如何，但升幅肯定動輒以倍計。事關今年迄今，起碼十隻中南概念股升幅超過一倍以上，4隻更加有五至七倍升幅。

不過近兩個交易日，中南概念股開始不尋常急跌，保興（1411）、合一（913）及中國微電子（139），上周五分別挫26%至47%，三隻股份最大持倉證券行，就是中南證券。昨日保興再瀉13%，旗艦三龍（329）跌7%、合一及意達利（720）則跌半成。統計15隻主要中南概念股（見表），兩日內只有一隻升、一隻無升跌，其餘全數下跌。同期恒指連升兩日，是中南系客戶巧合地一齊沽貨離場，抑或個別原因，相信只有內幕人士先知情。

經常有人講，搵細價或殼股炒要睇市值，就算搵唔到食，都可以避險。不過這套哲學，放諸在中南概念股，似乎並不管用。

睇市值都冇用

今年中南系股份，表現最好的是確利達（1332），市值由一億多元，飆升逾7倍，至目前9億元。另一邊廂，市值已超過90億元的漢基（412）及麗盛（1004），今年急升前，市值亦已超過10億元，以為市值超過十億元就難炒起，殊不知越炒越高。

同樣地，被洗倉的中南系股票，單睇市值亦難捉路。例如合一及保興，由洗倉前約10億元，跌至目前只剩約6億元。不過，上周重挫的中國微電子，洗倉前市值曾達40億元，以為大隻就冇事，最後可能輸一半。

炒中南概念股，同入賭場賭錢冇分別，好彩可以一翻翻贏上去，但亦隨時一鋪就清你袋。願賭要服輸，輸打贏要，不如唔好玩。

王昇
https://www.facebook.com/stockwing1