入行早年，股榮經常要繙譯證券行報告，老細落旨要睇完四、五十頁的報告，然後撮寫成 400字，一開波當然老老實實刨晒，然後你會發覺唔對路，點解份份報告都好似阿婆念經，重複又重複第一頁所講的內容。往後只是將第一頁重點，小題大做，用數據、方程式、圖表比較洗你腦，無非是要你相信， X股抵買、 Y股要賣。
其實大行報告一睇無妨，但最唔妥有一點，今日真的不吐不快。不知幾時開始，間間大行、份份報告內容，我最關心的目標價都定死喺 12個月。但結果是分析員遲則三個月，快則三日（我真的見過，放榜前懶醒睇好，見光後衰咗翌日即改），已經因應變化調整目標價或評級， 12個月目標其實廢得可憐，但就無一間大行出一個月目標，三日到價預測。
今個月瑞銀出咗過金手指分析員，梁裕昌 3月 1日發表霸王（ 1338）報告，股份即日彈兩成，上個禮拜三及四，出兩份報告唱好特步（ 1368）及歲寶（ 312），股份單日進賬 7%及 25%。梁生成名作為去年單挑唱衰利豐（ 494），係咪咁神？統計其三隻所屬股份，得出結論是，分析員屬高級版財演，短跟誇啦啦，長揸一係坐艇，一係被人挾爆。
分析員淪大戶打手
翻查過去一年，梁生負責的三隻股份（見表），兩隻長期叫買、一隻長期叫沽。可惜偏偏事與願違，特步由最高 6.17元跌到 3.23元，霸王由 2.4元跌至 1.43元，睇淡的利豐，八個月前睇 9元，現時已 double上返差唔多 18元。睇長唔太準，但短線回報相當不俗，每次出擊跟買跟沽，平均回報近 3%。
坦白講，股票市場細有細玩，大有大玩，一般財演多數推介二三線甚至莊家股，散仔得一注錢，追入執 10格，賺到茶煙錢已經割禾青走人，但揼石仔揼得多，總會有失手之時，贏五次，可能輸一次已經倒蝕。這也解釋股票市場，八成人輸錢的原因。
分析員寫報告，出發點可能是作長期價值投資，但每逢發佈，往往淪為高級版財演，間接成為大戶打手，推介股份瞬即成為大戶及基金即日鮮佳品。誠如上周五中移動（ 941）爆升 4%，也是拜高盛報告所賜，證明報告有一定的市場價值。
大戶本錢較厚，亦最先收到大行報告，快人一步，用閒錢落注，一般要執數 10格並非太難，無論即食或放紙鳶，都不可能等升到目標價或等足 12個月先放手。總結一句，大行 12個月目標價，認真你就輸了！
沒有留言:
張貼留言