新股炒作有法

識Pro J嘅都知道，歌神學友係Pro J嘅偶像，當然今時今日嘅Eason都係！Pro J好細個已經為學友哥哥作曲同填詞，都係我嘅光榮。
學友嘅廣告唔使講，梗係令我諗起啱啱上市嘅天喔國際（1219）啦。當你見到佢飲住支靚茶，悠然自得嗰樣，肯定佢嘅心情應該好番晒啦，演唱會大爆，梗開心。

天喔多大飛唔簡單

Pro J咁留意天喔國際，除咗係因為佢大灑金錢打廣告推品牌外，最緊要係佢IPO嘅過程，令到Pro J眼仔一亮，4,000人入飛，超額認購55倍，凍結咗88億元，計落條數一張飛平均逾200萬元，Pro J覺得點睇都係一張唔弱嘅飛！

況且管理層對行業又話充滿信心，話唔怕接受任何挑戰，重大力吹雞話會加大自有品牌飲用香檳比例。

作為管理層，雖然經濟放緩，但又話業務有增長。至於大家擔心嘅成本控制，佢哋梗係例牌話唔會轉番落投資者身上，廣告又話要保持一個合理水平，聽落都可以接受。

寫到呢度，你又會問我，𠵱家應該點睇，以PE計算，天喔第一口價係3.15元，計番PE約係22倍。

如果以同行嘅旺旺（151）做一個比較，旺旺嘅PE約30倍。如果你要問我點睇，Pro J有一個新股動力投資法，因為市場嘅反應比招股書講嘅，梗係更加直接同有意義啦。

新股無往績可尋，一般Pro J會睇佢3至4日嘅走勢，如果佢升穿到佢嘅所謂短時間歷史高位，加上有動力，當然要追，相反，如果炒唔上，向下跌咗佢嘅所謂短時間歷史低位，唔好浪費時間，搵第二隻炒過，收到未？

徐燦傑
中國銀河國際財富管理主管