左丁山 : 羊年犯太歲 / 團年開工吉日

羊年犯太歲

一月十三日本欄提及「讀者敦促」，講到已有讀者要求一如去年，搵高人批羊年流年。左丁山那敢怠慢，立即找到中大聯合書院校友游應森兄代為聯絡同佢亦師亦友嘅易學會會長傅沛基先生（下稱傅會長），憑游兄面子，傅會長特別騰出空檔，於一月二十一日星期三中午及下午出城，接受左丁山訪問。

於是乎在陸羽茶室訂好位，恭迎傅會長伉儷。點知食完午飯，去到埋單時份，游兄一聲唔該，搶去賬單付鈔，真係多謝之至。飲茶後請傅會長到寫字樓，拿出紙筆，請傅會長指示明年乙未羊年方向，本來秘書一早準備好一枝錄音筆嘅，秘書趁午飯時間去咗睇醫生未返，點知左丁山笨手笨腳，秘書不在就唔識開着枝錄音筆，唔通等秘書返到先至啟動咩，於是索性只憑筆錄強記，如有錯漏，乃左丁山之責。

傅會長先來幾句開場白，要左丁山及眾人記住，順天行事，凡事睇開啲，總要積番啲陰德，與人為善，勿抱佔人便宜之心，持守公道。口訣云：「得失榮枯總由天，機謀用盡枉徒然，無藥可延卿相壽，千金難買子孫賢，若能了解陰陽理，一日優閒一日仙。」又云：「孤陰不生，獨陽不長」，蓋陰陽相交生萬物，世界先至可以維持平穩，代代生生不息。傅會長驚左丁山聽唔明，特別講多句，「依家世界興起陽對陽，陰對陰，違反自然，長此以往，人類消亡矣。」左丁山聽完，諗咗十秒，不禁失笑，陽對陽，男溝男也，陰對陰，女女同房也，當然不能誕生下一代，若成為風尚，世界人口自然減少，難以維持平穩，即使陰陽相接，若為自己玩樂計，不願生育下一代，如21世紀之日本，人口亦會逐年減少。當然，此問題目前只在先進發達國家出現，菲律賓、印度嘅人口增長甚勁，係未來亞洲經濟動力。左丁山知道最多人想知之事，就係邊個生肖犯太歲，傅會長云，

明年係乙未年，由2015年2月4日立春之日開始（當日上午十一時五十八分），唔係計2月19日年初一嘅。在2月4日中午十二時後生人，已經係羊年出世。未屬土，與辰戌丑相同，四者皆犯太歲，以生肖計即係羊、龍、狗、牛犯太歲，最嚴重者係牛（丑未相沖），兼且睇通勝天乙星官圖，牛人有歲破、大耗、欄干、月煞四凶星，頭上無吉星相扶持，幾唔妥，傅會長亦指出，雞人（酉）雖然唔犯太歲，但亦係只有凶星，無吉星，亦應該與羊、狗、牛、龍一樣掛太歲牌。 

團年開工吉日

羊年以農曆節氣論，在2月4日開始，犯太歲有羊（未年生人）、牛（醜年生人）、龍（辰年生人）、狗（戌年生人），另外其他生肖中，雞（酉年生人）雖然唔犯太歲，但時運比較差啲，傅會長話，上述五生肖人士，皆宜掛太歲牌，或往寺廟拜太歲祝福，拜完要記得來年到寺廟還神。肖雞者要特別注意桃花劫。

按照通勝「天官賜福」圖解，十二生肖之中，就係只有酉、醜頭上無吉星扶持，其他十生肖都有一至三粒吉星「照住」，最好嘅就係與羊相合（午未相合）嘅馬年生人，

馬（午）人有三吉星相扶，「歲合」、「文昌」、「天廚」，只須提防小病及到陌生地方探險。

老虎（寅年生人）亦唔曳，雖有「暴敗」、「天厄」，「亡神」凶星影響，頭上有三吉星「天喜」、「紫微」、「龍德」相扶，可逢凶化吉，有驚無險。

左丁山聽見「馬」最好，不禁㗎㗎笑，因為成日去馬場噃，自己係經理人嘅校友團體隻新馬又剛啱到咗香港，經常與馬為伴，應該沾番一啲好運氣啩，何況在公在私，都有「馬」人幫手呢，但傅會長即刻提醒：「你自己犯太歲呀，要小心合約及畀人篤背脊等事情，為你帶來困擾。」係嘅，係嘅，左丁山今年最好少做少錯。

既然2月4日已近，那麼家人團年，公司埋年吃飯又如何揀日子。傅會長話：「舊語雲官三民四，今日官府衙門已經唔搞呢套，公司廠商店舖當係官啦，老闆請下屬吃飯嘅好日子係2月11日（星期三）定日，碰啱當日中午吃飯時間係吉時，至為理想，但如果老闆係壬子、甲子年生人就要避忌咯，可改在2月12日（星期四）執日，當日中午亦係吉時。

至於家人團年，我選咗二月二日星期一成日，忌癸卯己卯生人。」如果在星期一返工，嫌匆忙，可另選二月一日星期日（危日）嘅，是日忌壬寅甲寅生人，晚上吃飯時間係「中」，傅會長話揀呢兩日係要在立春之前團年，如有人依舊例，在乙未年初一之前團年，勿選年三十（2月18日）閉日歲破，2月15日星期日（成日）較佳，晚上且是吉時。

好嘞，按日曆日子過年之後，幾時開年開工先啱聽呢？傅會長話一般舊式店舖多在年初二開年，碰啱年初二（2月20日）係好日子，十一點開舖吃開年飯係好時辰，就揀呢日開年啦。開工吉日囉喎，左丁山最注重，今年甲午年年初四（2014年2月3日）星期一係四絕日，諸事不宜，但政府假期完畢，係指定開工日，結果是否理想，請打工仔檢討一下，政府就似乎頭頭掂著黑，諸事不順嘞。明年羊年年初五（2月23日）星期一就係大好日嘞，傅會長勸左丁山唔好偷懶，放少幾日假，就在年初五早上開工，全年吉利咁講！ 

講完犯太歲及團年開工吉日，一身鬆晒，左丁山轉問乙未羊年大體運程，傅會長話乙未年大利西南（坤位），有九紫吉星，應有喜慶如結婚，生兒女，得獎賞榮譽等事情，香港地標就是扯旗山，剛好就在西南方。

故此可引申到香港在乙未年喜慶多起，既然如此，市民開心，政府抒一口氣，全年香港運氣應該唔錯，但要注意嘅係，西南方係未位，即太歲位，千萬不可在太歲頭上動土，各人要注意家中西南方位，在乙未年打一口釘亦屬禁忌，否則麻煩自招。左丁山對傅會長講：「整體就難啲喎，香港西南方不時大興土木，點會不動土。」傅會長說，有方法減低損傷嘅，工程開工時，搵有識之士指點吓就得，睇吓政府會唔會，肯唔肯啦。

逐個方位講又如何？傅會長教左丁山讀通勝之「乙未年山向月利圖」，左丁山智慧稍欠，似明唔明之間，只好作筆錄：

東方震位屬木，有一白，主有名聲，中國玄學風水，以中國為中心，中國之東就係韓國日本美加等，應聲名日顯；

東南巽方屬龍蛇，有二黑星，當黑也，在此方位不可落釘，防有眼痛，中國之東南就係東南亞，提防星馬在羊年當黑？

東北艮位屬牛虎，有六白，主有權力，因此要防範權力鬥爭。

正南離位屬火有七赤，主有騙財呃錢，破財等事情，在南方慎防受騙，用黑杯裝水放在南位，一於以水剋火，以免受騙破財。

西方兌位屬金，有五黃，即歐洲，中東一帶，主有災難，病疫，最為不利，在辦公室不要背西而坐，於西位放紅色瓷器馬一隻（以火剋金）阻災星入侵，因西方屬金，金受侵襲亦象徵金融不穩，在一片減息量寬大潮流之中，黑天鵝偶發事件會突然之間破壞一片唱好之牛市，令散戶猝不及防。

西北乾位屬豬狗，有四綠，主男女關係不正常，夫妻關係受損，如夫婦睡房及大床在此方位，宜小心。

北方坎位屬水，有八白，財星也，發財往北方，佔北位。

中央位在東南西北之間，有三碧，主多是非，多爭議，反映政治局勢緊張，至於如何影響香港，非吾人所知也，或者呢樣就係香港現實情況。

以上所言，信不信由得你，正是信則有，不信則無，自由選擇，不用來電郵罵左丁山導人迷信！

今日立春 ( 4/2/2015 )

去年二月四日年初五立春，左丁山問八卦丘批一批，指出馬年恐怕（一）火災多；（二）市民火多氣頂谷到爆；（三）政治僵局可導致火頭四起，街頭示威多。講經濟就話秋冬之時，金水齊來，香港運程會好一點，傳媒方面，報紙唔慌會好，屬火之電子互聯網則十分興旺。

眨吓眼，一年過去，今日又係立春之日，係乙未羊年開始之日，於是前幾日又搵八卦丘傾吓偈，批一批。

今日立春係乙未年，戊寅月，辛亥日，甲午時。八字有2土3木1水1金1火。

日主係辛金（陰金）。辛金見於春天一月（正月，今年係戊寅月），開始有陽氣，但寒冷未除，要有太陽照耀，方得暖和，太陽即係屬火，但八字之中，只有丁火（午，陰火），似乎熱量不足，還好寅內暗藏甲木、丙火、戊土，故此寒氣可除，令辛金不致凍僵。

暖就暖嘞，辛金生機如何？八卦丘話，戊土土厚，難以生金，己土生金最好，但立春之日，己土藏於未，唔算明顯，而且甲木在時，有剋土之能（令土失去作用），幾唔盞。

八卦丘盤算一輪，話正月辛金最好有己（土），有壬（水）同時出現於四柱，但今年立春木多，春月木旺嘅話，需陽金（庚金）剋制之，方可護土，偏偏立春八字缺庚金，木勢不可擋，故此辛金偏弱，難以睇得太好。

去年馬年立春係丙午日，火太多且強，今年羊年立春係辛亥日，木當道，日主辛金勢孤力弱，在實際層面，有何指示？八卦丘推論話：「羊年木多壓土，恐怕房屋土地要受壓，樓價回一回氣，不足為奇，買樓買地產股要謹慎啲，日主辛金體弱，雖有壬水（藏於亥）沖洗，顯得清高，但無己土生發，金融唔會叻得去邊，股市係浮浮沉沉格局。

政治方面，木係東，金係西，以中國為中央，東方係美國，西方係歐洲，似指美國強，歐洲陰柔疲弱，土在中央，即中國啦，木剋土，中國不甘心受美國勢力壓制，定有暗戰，但在羊年還不可以超越美國。

去年甲午年，天干屬春，地支屬火，火焚木，以下犯上係常態。今年則調轉，上乙木下未土，下面受壓制，故此去年學生反政府，今年就係政府砌學生咯，梁振英政府會採取強硬政策對付反對人士！」

1月26至28日一連三天寫羊年太歲、吉日，以為交咗功課，點知讀者來郵不絕，要求寫埋在各方位擺設物品，好彩一位朋友在《經濟日報》2月3日至2月6日亦有寫過傅會長採訪筆記，一如往年，經取得同意後，左丁山為應讀者要求，重複寫一次。

羊年太歲牌之形狀，各師各法，傅會長每年為做善事，設計／訂造一批，以成本價售予私人友好，好快就沽清。不過在各大華人廟宇皆可拜太歲，傅會長提議讀者（如果信呢樣）在新年年初入廟參拜之時，拜埋太歲，到年尾還神。左丁山記得每年去車公廟都見到有太歲牌出售，大家可參考參考。

至於羊年方位，最不利係西方（屬金），有五黃及三煞，主有病患、破財及是非，影響健康及心情，傅會長話全年在西位放置一隻紅色瓷馬（紅色乃火之顏色，火剋西方（屬金），兼且馬亦屬火，而馬在羊年最為得令。）

正南位（屬火），有七赤，主有騙財呃錢之事，全年在此方位放一個黑杯（黑色是水色）裝水，一於以水剋火。（左丁山按：中國傳統藏書閣之大門招牌皆為黑色）

東南方有二黑，主運氣差，影響中年女性健康，在此方位置圓形銀碟一隻，若無真銀碟，次選為銻碟。

西南偏南屬未位，即太歲位，全年不可動土，於此方位放綠色直身花瓶，養三枝或八枝富貴竹。

正北有八白主財運，在此方位放杯水或養缸魚，可以趨吉。

其他方位唔再講咯，搞掂上述諸事，全年小心行藏，積德行善，便有好報。

傅會長講過幾次西方偏弱，正北旺財。中國之西就是歐洲，不以五黃三煞分析，我地都知道歐洲已陷入通縮危機，歐洲央行大力推行量寬救市，點知偏逢希臘嘅激進左翼聯盟贏到大選，上台執政，已宣佈重新提高最低工資返回歐債危機前水平，撤銷財政緊縮政策，退休長俸照舊制發放，人民自然歡呼萬歲。

新人上台，必然如此，唔係嘅話，如何向選佢嘅選民交代？但希臘左派咁樣做，在經濟學上就是引起一場現場直播大革命，左派經濟理論是否真的可行，可以挽救瀕臨崩潰嘅經濟體系，問題焦點係希臘肯唔肯，可唔可以還債，避免違約風暴？避唔到嘅話，五黃三煞殺埋嚟，歐洲真係麻煩到極。

左丁山