港股連升七個月接近5,000點，越來越多人加入大時代2.0唱好行列，但環顧散戶熱情及投入度，卻未見任何牛三熾熱氣氛。要判斷牛市可以去到幾盡、恒指可以升到幾萬點，斷估冇痛苦，講得出都是騙你。但環顧過去十年、兩次大升市爆破前的經驗，牛市Party完結前，會出現這五大訊號，宜家中了幾多，睇埋落去。
第一：富豪講股。2007年港股大時代，除了例牌一堆專家唱好，四叔李兆基更財演上身，滔滔不絕大談股經。由8月宣布直通車，不斷推高恒指目標價，不時強調「好掃貨喇」。最經典一幕，就是10月見頂該月，有攝記影到四叔手執一堆「貓紙」，但完全不用讀「貓紙」，便講得出11隻心水股。
富豪講股，凶兆。但連財金高官亦口沒遮欄自high講股論市，就要特別小心。2015年4月上旬，港股大升市兼成交2,500億，港交所CEO李小加就話：「現在只是開始」，翌日時任財爺的曾俊華竟說：「未見泡沫爆破」。結果，港股大時代只維持一個月就玩完。
第二：學生打工仔變股神。牛市最後一期，人人都是股神，阿媽炒股唔炒餸、醫生一路睇症一路望股票機、清潔阿姐贈你一堆怪冧把，然後講得出「貨源歸邊、莊家做嘢」等術語，但都不及有大學生用7萬炒到350萬，有經理辭職炒股月賺4萬這類凶兆報道。2015年北水瘋湧來港炒股，有婦女「胸運」走私191萬現鈔來港的報導，越是光怪陸離，越聞到燶味。
第三：全民皆股，冧把渴市。07及15年兩次大升市，散戶後知後覺之時，亦是派對倒數時刻。成交連續超過千億是最基本要求，到了尾水，成交一般是爆升前的兩至三倍。如2007年10月最高每日成交達到2,000億元，2015年4月最高每日曾見近3,000億元。全民炒股谷高成交，連帶「財經專家」專欄點擊亦以倍數飆升。2015年4月曾淵滄專欄，每日點擊曾超過五萬，是平日的兩至三倍。
第四：好消息變反高潮。07年10月30日恒指於三萬二見頂，11月1日，有炒家狂吸港元，促使港府五度入市捍衞聯滙，當大家以為有熱錢湧入掃港股，原來是反高潮。同樣，15年港股於4月27日近二萬九見頂，但早幾日（20日），內地再放水，人行降準備金達1百分點。大家以為阿爺放水，原來是散水。慎防好消息變反高潮，去Party都要搵定出口處。
第五：蘋果A1魔咒。財經新聞成為A1頭條，周不時發生。但如果持續性高密度，大家要特別小心。附上07及15年大市Party完結前，港股相關報道多次成為蘋果A1以至A2頭條。最近一次財經相關新聞上A1是7月5日，當日標價是「官媒轟《王者榮耀》陷害人生，騰訊股價挫4%蒸發1,099億」。然後，是冇事發生，騰訊股價由260元升上300元。
五大凶兆訊號，暫時未曾發生。當港股上A1時，大家先擔心也不遲。
股榮
沒有留言:
張貼留言