轉貼文章 ~ 三隻容易受傷的股票

細價股洗倉潮未完，最近留意到，香港討論區及高登財經站，有關叫人撈洗倉股可以勁賺的帖文急增，打手在散戶市場冇啖好食，唯有轉移陣地喺討論區搵客接火棒，相信係塘水滾塘魚下，細價股會越炒越短癮，而洗倉股亦極可能洗完再洗。
早前被狙擊的德普科技（3823）昨再跌一成半，成交達億八；工蓋（1421）亦瀉逾一成，八個交易日內暴跌近八成，成交都有3,000多萬。講到冇陰公程度，兩隻創業板的飲食股，莊家頂一日就散走，飲食概念（8056）三日累瀉84%，皇璽餐飲（8300）上市三日，同樣高位唔見八成。

馬後炮人人都識，股榮羅列今年上市的25隻創業板股，借鑑洗倉股兩大特徵，市值高及累積升幅大，有三隻股票屬容易受傷，大家可特別留神。

今年上市的25隻創板股（表），20隻是全配售，5隻有公開認購。以昨日收市價計，已經有八隻低過配售/發售價，跌幅介乎18%至43%。如果用最高價與收市價比，結果更震撼。有7隻股票，收市價較最高價跌了九成或以上，累跌五成以上更有12隻，佔總數一半。換言之，並非圍飛攞貨的散戶，輸錢是must。

25隻創板股中，有三隻目前收市價較配售價仍然有10倍升幅，包括翠如BB股聯旺（8217，升39倍）、正利控股（8318，升19倍），以及盛良物流（8292，升16倍），三隻股份的市值分別是130億、57億及47億元。今年七隻高位跌了九成的創板股，目前平均市值是2.4億元。

股榮

http://hk.apple.nextmedia.com/financeestate/art/20160812/19732676