新亞校友電腦C夫婦自加拿大多倫多回港探親及行街，好多同學校友請他倆吃飯，徐立之夫婦率先搵埋一班老友在香港會為電腦C洗塵，不過徐立之大概在不久的將來亦會返回多倫多咯。
此日輪到左丁山請佢吃飯，搵埋與佢同期嘅船務C、律師Y、人力資源專家F等一齊，船務C去咗廣華醫院睇病，要排隊噃，時間難以控制，自不然遲到十幾二十分鐘，點解要過海到廣華醫院而唔去中建大厦呢？船務C話：「我係東華三院總理吖嘛！」咁又啱嘅，做東華總理，一年捐錢不少，聽講做到主席嘅話，一年要捐幾百萬，加埋預先做咗幾年總理，到從主席落任時，總要捐夠千零萬先至得。如此慷慨解囊做善事，唔怪得以前港英政府一定授以勳章，以示謝意及鼓勵。
船務C原來係頸痛背痛肩痛，揸住一大袋西藥，人力T一睇見就搖頭，佢話：「我係久病成醫，因經年累月打網球與高爾夫，十零年前就發生肩痛手痛背痛現象，按摩師話我嘅背部肌肉硬如石塊，我遍訪名醫，中西醫都睇，久醫無效，卒之得名人介紹走到上廣州陸軍醫院，軍醫話呢啲病難以醫治，必須靠自己日日做體操。
我綜合不少中醫、西醫意見，每日練三招：
（一）雙手緊握單槓，身體在空中垂直擺動，初次做一分鐘，已經難捱。為此我在房門裝咗一枝牆對牆鐵管，作為單槓。
（二）滾背，先做push up二十至三十次，放鬆肌肉；然後仰卧，抱雙膝到胸前，上身仰起直至膝頭碰到頭部，做二十次。
（三）仰卧床上，頭在床尾向下垂，類似理髮舖洗頭姿勢，維持大約五分鐘，有高血壓者就要小心啲，唔好做太耐。
我每日早上返工前做呢三樣動作，時間在二十分鐘左右，有助身體血液流通，如是者做了七年，我現在乜嘢痛都冇晒，背部肌肉十分柔軟，fit過好多後生同事。」律師Y聞言，不避嫌，大力㩒佢背脊，為之驚嘆，肌肉真係好軟噃，左丁山於是問佢攞notes話返屋企試吓，人力C話，俾你無妨，但聽完我講而照做之人，冇一位有恆心維持一個月！ 
沒有留言:
張貼留言