市場信心由冇變有，係建基於一種安全嘅感覺。之前日升日跌，今日驚聽日跌，點會買，但係噚日有大升市出現，市場安心感覺返晒嚟，原因係已故曹Sir一句有「C（勢）」。至少令你覺得個「C」咁勁，點都認為第二日裂口高開吧，咁有乜依郁升幅收窄，都可以走得切、唔使輸、打個和，兩個字「穩陣」。市場上唔少人有呢種思維，自然個市有人追，成交增加，噚日主板就有926.9億元，之前單日唔夠700億元。呢種講「C」嘅思維，都算係趨勢投資。
以舊年10月至今嘅走勢去睇，大陽燭之後嘅走勢實在話唔埋。由舊年11月開始，即中期跌浪到家陣，共有三次喺短期反彈浪出現單日大陽燭兼成交增加，但三次都即時結束反彈，轉升為跌。當然，呢個唔值得分析，因為今日就開估。
重點想講嘅係，趨勢型投資者，由2009年威到2015年，但就係價值型投資者嘅墳墓，同時有濠賭、科網股越強越升，估值越高越有人炒，最重要玩個「C」字就賺錢。價值投資信徒，嫌貴嫌剩，又話科網濠賭股唔值得相對滙控（005）、內銀股咁多溢價，結果買內銀股，足足迷失咗6年。
呢幾個月內，已有多次個市有「C」就即刻掉頭，究竟係咪趨勢投資玩得太盡，係人都識，故時辰到要轉吓模式去炒股？繼續觀察落去先，至少趨勢投資冇咁work，確係警號。
晉佳
沒有留言:
張貼留言