轉貼文章 ~ 習大大氣場頂得幾耐??

6月28日，繼續陽光普照，但慎防失驚無神嘅驟雨，一街之隔過雲雨照頭淋，過埋條馬路又陽光普照。呢個情況跟噚日港股大價股高處未算高，屢創新高；另一邊廿隻細價股跌逾七成，跌幅榜冠亞季軍更跌九成相當似，一邊天晴，一邊落狗屎。

　　講番個市，噚日可以話悶極中帶點精彩，悶嘅係指數仍然唔上唔落，呢個原因講咗幾日，唔再recap；精彩嘅係準備食晏嘅時候，竟然超過廿隻股仔暴跌，仲要係唔跌七成入唔跌廿大，呢個情況記憶中係古天后從來未見過。不過大市對於超過千四隻股票下跌，恒指僅跌32點，似乎無動於衷得有點過份，歐美股市弱勢漸現，港股就算有習大大氣場頂住，回歸同期指結算等因素過後，港股要調整在所難免。

　　股仔爆煲唔係乜新鮮事，但超過廿隻股仔暴跌，仲要係同出一個莊家門下，咁嘅滅門慘案真係難得一見，堪稱大開眼界。至於呢單「粉塵爆炸案」嘅起因，市場版本有幾個，古天后認為最貼近事實嘅，應該係莊家資金鏈斷裂，諗住手上咁多隻股仔，搵一兩隻減磅套現，誰知惹來其他內地幫手坐貨嘅「基金」(好聽啲咪私募基金，事實係坐貨金主)齊齊掟貨，結果搞到同門整個系列股份齊齊過堂，插水反艇。

　　一般莊家股爆煲，大家都以為個莊無錢補孖展，侷住斬貨損失慘重。實情係莊家由高位派貨，沿途派落去，散戶接貨，莊家拉勻平均價，晨早已袋袋平安。至爆煲當日極有機會係賺頭蝕尾，甚至係有心洗太平地，狠狠地帶頭質貨，質到有押股幫莊或其他坐貨金主，頂唔住低位打靶，莊家或大股東再施施然低位橫手接貨，跟本就係一個完美「安逃生」計劃，往往散戶或者幫莊係受害者大輸家。古天后好耐之前已悟出一個道理，「知內幕，輸大鑊」，呢個世界邊有咁多內幕，只有用內幕消息吸引散家入場，莊家先有機會派貨。至於幫莊都要損手，道理好簡單，「識莊家，輸身家」，莊家往往就係利用身邊熟人，幫手坐貨，接貨，愈知得多，愈易迷失。

　　當然無論散仔抑或幫莊，輸錢通常皆因贏錢起，即使心知所持股仔根本唔值咁嘅價，但見股價愈升愈有，就會開始搵理由麻醉自己，令自己相信本來屬於堆田區嘅垃圾股，未來錢景係股王級數。對於細價股，古天后甚少推介，但又唔係完全唔炒，只係自2015年細價股炒到七彩後爆煲，近呢兩年股仔真係甚少炒得郁。既然大勢係買大唔買細，強勢重磅股跟弱勢股仔背道而馳，點解唔跟住資金搵食，集中火力專心搞好大價股，反而執迷不悟，認為股仔一鋪發達。好老實，大手買細價股，一鋪清袋見得多，一鋪暴富除咗莊家，真係無乜幾可。

　　古天后

　　(徐狄怡，證監會持牌人)

之二~~~~~~~~~~~~~~~~~~~

「粉塵爆炸」又係資金鏈斷累事

噚日市場焦點，當然係細價股又爆股災，逾20隻股仔跌幅超過三成。今次有啲唔同嘅係，噚日大部分喺跌幅榜出現嘅股仔，曾經出現過喺上個月股壇長毛披露嘅50隻不能買的港股名單之中。心水清嘅金融圈人，即使唔百分百了解呢50間公司當中千絲萬縷嘅關係，但一眼已看穿係圈中俗稱「粉皮系」股份。呢一系列股份，係由兩位活躍於圈內嘅大哥做指揮官；至於粉皮系名稱由來，跟兩位大哥稱呼有關。而噚日榜上有名嘅，大部分以粉系股份為主。

粉系股份爆煲，實在有跡可尋，當中有隻同電視台小花扯上關係的股份，正正係今次粉系股爆煲嘅藥引。傳聞喺上個月，有人拎住嗰隻「小花股」嘅控股權四圍撲水，講緊嘅係以控股權咁大筆股份押倉，大概係超過4億股。以未暴跌前股價計算，市值超過40億元，目的係押倉借3億現金，講緊LTV（loan to value）一成唔夠。「小花股」乜料大家心中有數，莫講話一成LTV，創仔根本係一毫子都借唔到。其後等錢使嘅事主，出動旗下另一主板股份「遮仔」撲水3億，結果又係得個吉。

借唔到錢事少，莊家撲水消息一傳十，十傳百，「小花股」股價上星期開始急跌，當時已有行家聞到燶味，開始追事主減孖展。屋漏兼逢連夜雨，系內「舊BB車」由月初停牌至今未有聲氣復牌，最大鑊係是次停牌唔係主動式，而係證監停賽，原因係年前有關宣布公開發售嘅通函有重大失實、不完整或錯誤引導資料。舊BB車停牌已多個星期，旗下「濕地貝貝」開始被閂水喉，至少銀行本來放緊水畀佢放數，見佢母公司咁耐唔復牌，點都有戒心，call loan減低風險亦係正常舉動。當銀行閂水喉，行家又call孖展，四面楚歌下，終引發噚日「粉塵爆炸」。

沽貨多屬大股東及莊家

細價股股災後，噚日魚缸內傳聞四起，有傳話有人被請飲咖啡，不過呢個傳聞即時有友好喺社交平台澄清，表示當時人未有失蹤，「粉塵爆炸」係有大陸佬掟貨。好老實呢系股份有幾多大陸佬參與，佢哋係大陸嚟啫，但唔係「大陸喱」，明知唔係自己主場，即使參與都係畀面派對，能夠令股價冧到七彩， 除咗大股東同主要莊家，邊有咁多貨掟。有大陸佬跟隊逃生唔出奇，但話佢哋帶頭沽貨就講唔過去啦！

另一傳聞話莊家旗下證券行被證監釘牌，都係唔多合理，反而上述理由因為被罰停賽公司，被閂水喉較合邏輯，呢個亦係引發資金鏈斷裂主要原因，導致莊家周轉不靈。至於仲有一個版本話港交所（00388）曾建議抵制殭屍股，要強制低於1元股價、交投唔活躍嘅疑似老千股退市，目的除咗打擊近年活躍嘅借殼活動，也鼓勵新股上市，引發細價股股災。講真，呢個解釋合理得嚟可能性唔高，港交所要激活更多新股上市，打擊借殼係事實，但有心借殼嘅公司，根本就係唔想按正常程序上市，港交所出招打擊，佢哋亦會搵灰色地帶走位；加上當年鄺其志年代曾發生「仙股事件」，亦引發一場細價股股災，斷估港交所汲取當年教訓，應該唔會重蹈覆轍。其實任何股份爆煲，都離唔開call孖展同斬倉，講到尾咪又係錢作怪。

麥狄文（徐狄怡．證監會持牌人）