上周「投資導航」講牛熊證街貨量可視為後市「明燈」，結果準到無朋友，熊證街貨過去一周日日遠遠拋棄牛證街貨，結果港股一個禮拜升足五日共 2000點。睇淡的人（買熊仔）越多，港股越升，這種相反理論再次印證師奶阿叔長期成為大戶魚肉對象。
今期「趣 BLOG BLOG」搵到另一個明燈指示：財經演員指數，準繩度拍得住牛熊街貨量，唔想輸錢的朋友，今期要睇實。
所謂財演指數，其實是股份曝光多寡，全港超過 1500隻股份，按道理，今日你貼中移動（ 941），機會率低於 0.1%，但神奇地，筆者綜合過去 7個交易日，統計當日全港十份主流報章及五份免費報紙投資版專欄推介股票，發覺全城約 100位財演、獨立股評人、專欄作家等，總不約而同地，對某些股份情有獨鍾，最多被推薦股份，少則 4次，多則 6次，不過成為財演指數股後，當日表現往往跑輸大市，究竟玄機何在呢？
要分析箇中玄機，可由揀股方法落手。股佬或股婆貼股，通常有三種。睇基本因素（業績）、睇技術指標（走勢圖），最後是收到風有料到或小圍食飯後，拍膞頭叫到吹兩句。第一種在業績高峯期間，最大機會成為財演指數股，不過係淡市牛皮市況中，第三種則最常遇到。
散戶應多做功課
業績高峯期間，績優股曝光次數多絕不出奇。但於 24日放榜的 I.T（ 999），卻事先在 20日竟被 5位財演唱好，同日摩根大通亦發表報告推介，預測業績標青。當日大市跌 1.8%， I.T股價挫 3%並不意外，叫人驚訝是放榜後 I.T勁減派息，存貨又激增，股價瞬即急跌 16%， 5位財演由當日推介至今，股價累跌一成，同期港股升 9.3%。
最經典要數雙樺控股（ 1241），五位財演 24號一致叫好，結果當日大市爆升 746點，雙樺竟逆市跌近 3%，推介至今累跌 7%，跟入的散戶肯定媽媽聲。根據或然率， 5位財演同日在 1500隻股份中推薦雙樺，仲難過中六合彩。
過去 7日，財演指數股 No.1，竟有 6日跑輸大市，唯一例外是公佈季度業績後的上海電氣（ 2727）， 4日累升超過一成。雖然難單單靠 7日成績去定奪財演唱好靠害，但投資者唔該睇完專欄、聽完財演意見後，自己做吓功課先好行動。
前輩教落，好股唔使唱都識升，只有爛股先要博宣傳爭取曝光，但本質不變仍然係爛。
股榮 
沒有留言:
張貼留言