壹仔早前訪問細價股炒家李鋈麟（ Alan Lee），李氏話佢係買藍籌股發達，誓神劈願話細價股係垃圾，大家千祈唔好掂。頭一句只有佢知真定假，但後兩句就珍珠都冇咁真。股榮整合市場上逾1500隻港股今年至今表現，得出的結論是買大價股容易賺，買中價股要靠運氣，買細價股輸死人。
市場上沒有一套原則去劃分大中細股，唯有用股價決定。
股價10元以上的股份視為大價股，數目只有127隻，佔整體8%，年內升的佔75%，跌則佔25%，今年至今平均錄得雙位數回報，相當不俗。最大隻的騰訊（700）再度跑出，回報接近五成，唯一失望的紅底股是港交所（388），買中佢你唔好彩。
股價介乎1蚊至9.99元的可列入中價股，總數593隻佔全數40%，由附表睇到，股價越高，你買中有回報的機會越大，成績亦見明顯差異。1至2元股份，年內平均回報跌至1.7%，較2至5元的逾8%利潤出現甚大落差。
細股價包括毫子股及仙股。今年共有664隻港股淪為毫子股，除了散戶傷亡枕藉，亦是基金大戶損手的重災區，年內超過六成毫子股要輸，整體平均蝕4%至9%。國美（493）、霸王（1338）、億和（838）等，跌幅五成以上，連歐洲股神都瀨完又瀨，就證明市況如何兇險。
仙股賺蝕比例1:30 好嚇人
去年底仙股數目少於80隻，今年增加逾半至124隻，年內有正回報的，表面有26隻，但扣除長期停牌的9隻，只有17隻可以稱得上有得賺，回報超過50%的只得一隻，不過跌幅超過50%的卻有30隻。基本上，炒仙股你輸緊九成，同掟錢落海無分別，反正要博，買牛熊證窩輪俾輪商屈機，點都好過俾莊家㩒住打。
喺牛市早期及中期， Small is beautiful，尤其是價殘的毫子及2蚊樓下股份最好炒，之不過，現時歐洲、中國以及美國各項問題都未解決，各國單靠吹水唔抹嘴，升得一時半刻，掉轉頭立即本利歸還。這一刻炒股，我相信 Big is beautiful, Small is painful。
股榮
股榮
沒有留言:
張貼留言