2012年1月19日 星期四

是耶非耶.....?

轉貼文章:


財經節目良莠不齊

2012年01月20日

長期睇淡不會累人輸錢,但在反彈市中,卻每每難免遭埋怨令人錯過博反彈機會,長線睇淡與短線睇反彈其實沒有抵觸,關鍵在於行動者的個人取向,假如只係博反彈,按圖索驥可也,問得嚟都蘇州過後冇艇搭。連盈警股都趁機聞雞起舞,有心人又不斷製造有利個別板塊如太陽能、家電、內房、養老金入市等傳聞,雖然小女子入市態度奉行睇清睇楚運用無比耐性,但正職本業生意難做、又擔心崗位隨時不保,遂選擇鋌而走險博賺快錢。
難怪本地媒體對搞財經資訊頻道趨之若鶩,可惜又沒有幾家能真正搞得有聲有勢,港人好炒賣之餘更愛即食,搞財經頻道、尤其即市答股俾貼士節目最吸引眼球,難怪免費台明知大勢已去,仍針對港府要加發免費電視牌照而「玩嘢」,甚至出現江湖傳聞,竟有公仔箱以「死」要脅,即以執笠令本地失業率上升要脅。適逢換屆,穩定壓倒一切已是大前提,一旦搞出個大頭佛,即係戰狼八百要隨時成為失業大軍,及官商角力的犧牲品。
為免節外生枝,聞說有關當局稍放慢腳步,據聞有關公仔箱的談判底線,就係要逼港府收回對英語頻道的節目語言限制,變相多了一條可用頻道,隨時可以求其擺兩丁友,對住鏡頭一唱一和唱雙黃。

部份主持欠金融知識


呢類節目睇得多,有時真的懷疑部份對金融一知半解的主持們,金融知識培訓不足,以為開個節目求其搵幾個行家輪流坐堂就叫做財經節目,以為投資就係炒股票,連幕後負責人都未曾接觸過金融業,對投資市場零知識零資訊,甚至懵到上心口,連嘉賓來歷都未查明,莊家股亦接入答股時段,令該批股份引起盲毛注意,令節目淪為幫莊家大戶散貨渠道、有心人地盤,荼毒眾生,很多時連提問嘉賓的問題亦好有問題,真有興趣想知這些主持究竟是否明白自己在發緊甚麼噏瘋,情況已慘不忍睹!
胡孟青
獨立股評人 

沒有留言:

張貼留言